Sir 48

1 ⲁⲩⲱ ⲁϥⲧⲱⲟⲩⲛ ⲛϭⲓ ϩⲏⲗⲓⲁⲥ ⲡⲉⲡⲣⲟⲫⲏⲧⲏⲥ ⲛⲑⲉ ⲛⲟⲩⲕⲱϩⲧ ⲉⲣⲉⲡⲉϥϣⲁϫⲉ ⲙⲟⲩϩ ⲛⲑⲉ ⲛⲛⲓⲗⲁⲙⲡⲁⲥ 2 ⲡⲁⲓ ⲉⲛⲧⲁϥⲉⲓⲛⲉ ⲙⲫⲉⲃⲱⲱⲛ ⲉϩⲣⲁⲓ ⲉϫⲱⲟⲩ ⲁⲩⲱ ⲁϥⲧⲥⲃⲕⲟⲟⲩ ϩⲛ ⲡⲉϥⲕⲱϩ 3 ⲁϥⲥⲉϣⲧⲧⲡⲉ ϩⲙ ⲡϣⲁϫⲉ ⲙⲡϫⲟⲉⲓⲥ ⲁϥⲛⲡⲕⲱϩⲧ ⲉϫⲱⲟⲩ ⲛϣⲙⲧⲥⲟⲡ 4 ⲛⲑⲉ ⲉⲛⲧⲁⲕϫⲓⲉⲟⲟⲩ ϩⲏⲗⲓⲁⲥ ϩⲛ ⲛⲉϣⲡⲏⲣⲉ ⲁⲩⲱ ⲛⲓⲙ ⲡⲉϯⲛⲉ ⲙⲙⲟⲕ ⲉⲧⲣⲉϥϣⲟⲩϣⲟⲩ ⲙⲙⲟϥ 5 ⲡⲉⲛⲧⲁϥⲧⲟⲩⲛⲉⲥⲟⲩⲕⲱⲱⲥ ⲉⲃⲟⲗ ϩⲙ ⲡⲙⲟⲩ ⲁⲩⲱ ϩⲛ ⲁⲙⲛⲧⲉ ϩⲙ ⲡϣⲁϫⲉ ⲙⲡⲉⲧϫⲟⲥⲉ 6 ⲡⲉⲛⲧⲁϥⲧⲁⲩⲉⲛⲉⲣⲱⲟⲩ [ⲉⲩⲧⲁⲕⲟ] ⲁⲩⲱ ⲛⲉⲧϩⲁⲉⲟⲟⲩ ⲉⲃⲟⲗ ϩⲛ ⲡ[ⲉⲩϭ]ⲗⲟ[ϭ] 7 ⲡⲉⲧⲥⲱⲧⲙ ⲉⲡⲉϫⲡⲓⲟ ϩⲛ ⲥⲉⲓⲛⲁ ⲁⲩⲱ [ⲛϩⲁ]ⲡ ⲙⲡⲉⲕⲃⲁ ⲛⲭⲱⲣⲏⲃ 8 ⲡⲉⲧ[ⲧⲱ]ϩⲥ ⲛⲛⲉⲓⲉⲣⲟ ⲉⲩⲧⲱⲱⲃⲉ ⲁⲩⲱ ⲛⲓⲡⲣⲟⲫⲏⲧⲏⲥ ⲉⲣⲡⲉϥⲙⲁ ⲙⲛⲛⲥⲱϥ 9 ⲡⲉⲛⲧⲁⲩⲁⲛⲁⲗⲁⲙⲃⲁⲛⲉ ⲙⲙⲟϥ ϩⲛ ⲟⲩⲉⲙⲛⲧ ⲛⲕⲱϩⲧ ϩⲛ ⲟⲩϩⲁⲣⲙⲁ ⲛϩⲧⲟ ⲛⲕⲱϩⲧ 10 ⲡⲉⲛⲧⲁⲩⲥϩⲁⲉⲓϥ ⲛϫⲡⲓⲟ ⲉⲛⲉⲩⲟⲉⲓϣ ⲉⲧⲁⲗϭⲟ ⲛⲧⲟⲣⲅⲏ ϩⲁⲑⲏ ⲙⲡϭⲱⲛⲧ ⲉⲕⲧⲉⲫⲏⲧ ⲛⲟⲩⲉⲓⲱⲧ ⲉⲡⲉϥϣⲏⲣⲉ ⲉⲥⲙⲓⲛⲉ ⲛⲛⲉⲫⲩⲗⲏ ⲛⲓⲁⲕⲱⲃ 11 ⲛⲁⲉⲓⲁⲧⲟⲩ ⲛⲛⲉⲛⲧⲁⲩⲛⲁⲩ ⲉⲣⲟⲕ ⲁⲩⲱ ⲛⲉⲛⲧⲁⲩⲛⲕⲟⲧⲕ ϩⲛ ⲟⲩⲙⲉ ⲕⲁⲓ ⲅⲁⲣ ⲁⲛⲟⲛ ϩⲛ ⲟⲩⲱⲛϩ ⲧⲛⲛⲁⲱⲛϩ 12 ϩⲏⲗⲓⲁⲥ ⲡⲉⲛⲧⲁⲩⲥⲕⲉⲡⲁⲍⲉ ⲙⲙⲟϥ ϩⲛ ⲟⲩϩⲁⲧⲏⲩ ⲁⲩⲱ ⲁⲉⲗⲓⲥⲥⲁⲓⲟⲥ ⲙⲟⲩϩ ϩⲙⲡⲉϥⲡ︤ⲛ︦ⲁ︥ ⲙⲡⲉⲁⲣⲭⲱⲛ ⲕⲓⲙ ⲉⲣⲟϥ ϩⲛ ⲛⲉϥϩⲟⲟⲩ ⲁⲩⲱ ⲙⲡⲉⲗⲁⲁⲩ ϫⲓⲧϥ ⲛϫⲛⲁϩ 13 ⲙⲡⲉⲗⲁⲁⲩ ⲛϣⲁϫⲉ ϫⲓⲥⲉ ⲉⲣⲟϥ ⲁⲩⲱ ⲁⲡⲉϥⲥⲱⲙⲁ ⲡⲣⲟⲫⲏⲧⲉⲩⲉ ⲉϥⲙⲟⲟⲩⲧ 14 ϩⲣⲁⲓ ϩⲙ ⲡⲉϥⲱⲛϩ ⲁϥⲉⲓⲣⲉ ⲛϩⲛϣⲡⲏⲣⲉ ⲁⲩⲱ ϩⲛϣⲡⲏⲣⲉ ⲛⲉ ⲛⲉϥϩⲃⲏⲩⲉ ϩⲙ ⲡⲉϥⲕⲉⲙⲟⲩ 15 [ϩⲛ ⲛⲁⲓ ⲧⲏⲣⲟⲩ] ⲙⲡⲉⲡⲗⲁⲟⲥ ⲙⲉⲧⲁⲛⲟⲓ [ⲁⲩ]ⲱ ⲙⲡⲟⲩⲥⲁϩⲱⲟⲩ ⲉⲃⲟⲗ ⲛⲛⲉⲩⲛⲟⲃⲉ ϣⲁⲛⲧⲟⲩⲡⲟⲟⲛⲟⲩ ⲉⲃⲟⲗ ϩⲓϫⲙ ⲡⲕⲁϩ ⲁⲩⲱ ⲁϥϫⲟⲟⲣⲟⲩ ⲉⲃⲟⲗ ϩⲓϫⲙ ⲡⲕ[ⲁϩ ⲧ]ⲏⲣϥ ⲁⲡⲗⲁⲟⲥ ϭⲱ ⲉϥⲥⲟⲃⲕ ⲉⲙⲛⲁⲣⲭⲱⲛ ϩⲙ ⲡⲏⲓ ⲛⲇⲁⲩⲉⲓⲇ 16 ϩⲟⲉⲓⲛⲉ ⲙⲉⲛ ⲛϩⲏⲧⲟⲩ ⲁⲩⲉⲓⲣⲉ ⲙⲡⲉϥⲟⲩⲱϣ ϩⲉⲛⲕⲟⲟⲩⲉ ⲇⲉ ⲁⲩⲧⲁϣⲉⲛⲟⲃⲉ 17 ⲁⲉⲍⲉⲕⲓⲁⲥ ϫⲓⲥⲉ ⲛⲧⲉϥⲡⲟⲗⲓⲥ ⲁϥϫⲓⲱⲅ ⲉϩⲟⲩⲛ ⲉⲧⲉⲩⲙⲏⲧⲉ ⲁϥϣⲉⲕⲧⲟⲩⲡⲉⲧⲣⲁ ϩⲛ ⲟⲩⲡⲉⲛⲓⲡⲉ ⲁⲩⲱ ⲁϥⲕⲱⲧ ⲛⲕⲣⲏⲛⲏ ⲉϯⲙⲟⲟⲩ 18 ⲁⲥⲉⲛⲛⲁⲭⲏⲣⲉⲓⲙ ⲉⲓ ⲉϩⲣⲁⲓ ϩⲛ ⲛⲉϥϩⲟⲟⲩ ⲁϥϫⲉⲩϩⲣⲁⲯⲁⲕⲏⲥ ⲁϥⲃⲱⲕ ⲁϥϫⲓⲥⲉ ⲛⲧⲉϥϭⲓϫ ⲉϫⲛ ⲥⲉⲓⲱⲛ ⲁⲩⲱ ⲁϥϫⲓⲙⲛⲧϩⲣⲟⲩⲟ ϩⲛ ⲧⲉϥⲙⲛⲧϫⲁⲥⲓϩⲏⲧ 19 ⲧⲟⲧⲉ ⲁⲛⲉⲩϩⲏⲧ ⲕⲓⲙ ⲙⲛ ⲛⲉⲩϭⲓϫ ⲁⲩⲱ ⲁⲩϯⲛⲁⲁⲕⲉ ⲛⲑⲉ ⲛⲧⲉⲧⲛⲁⲙⲓⲥⲉ 20 ⲁⲩⲱϣ ⲉϩⲣⲁⲓ ⲉⲡϫⲟⲉⲓⲥ ⲡⲛⲁⲏⲧ ⲁⲩⲱ ⲁⲩⲡⲱⲣϣ ⲛⲛⲉⲩϭⲓϫ ⲉϩⲣⲁⲓ ⲉⲣⲟϥ ⲁⲩⲱ ⲁⲡⲉⲧⲟⲩⲁⲁⲃ ⲥⲱⲧⲙ ⲉⲣⲟⲟⲩ ϩⲛ ⲟⲩϭⲉⲡⲏ ⲉⲃⲟⲗ ϩⲛ ⲧⲡⲉ ⲁϥⲥⲱⲧⲉ ⲙⲙⲟⲟⲩ ϩⲛ ⲧϭⲓϫ ⲛⲏⲥⲁⲓⲁⲥ 21 ⲁϥⲡⲁⲧⲁⲥⲥⲉ ⲛⲧⲡⲁⲣⲉⲙⲃⲟⲗⲏ ⲛⲛⲁⲥⲥⲩⲣⲓⲟⲥ ⲁⲩⲱ ⲁⲡⲉϥⲁⲅⲅⲉⲗⲟⲥ ⲟⲩⲟϣϥⲟⲩ 22 ⲁⲉⲍⲉⲕⲓⲁⲥ ⲅⲁⲣ ⲣⲡⲟⲩⲱϣ ⲙ[ⲡϫⲟⲉⲓ]ⲥ ⲁⲩⲱ ⲁϥϭⲙϭⲟⲙ ϩⲛ ⲛⲉϩⲓⲟⲟⲩⲉ ⲛⲇⲁⲩⲉⲓⲇ ⲡ[ⲉϥⲉ]ⲓⲱⲧ ⲛⲁⲓ ⲉ[ⲛⲧⲁ]ⲏⲥⲁⲓⲁⲥ ⲡⲉⲡⲣⲟⲫⲏⲧⲏⲥ ϩⲟⲛⲟⲩ ⲉⲧⲟⲟⲧϥ ⲡⲛⲟϭ ⲁⲩⲱ ⲉⲧⲛϩⲟⲧ ϩⲛ ⲛⲉϥϩⲟⲣⲁⲥⲓⲥ 23 ⲁⲡⲣⲏ ⲧⲟⲟⲧⲉ ⲉⲡⲁϩⲟⲩ ϩⲛ ⲛⲉϥϩⲟⲟⲩ ⲁϥⲟⲩⲉϩⲟⲩⲁϩⲉ ⲉⲡⲣⲣⲟ 24 ϩⲛ ⲟⲩⲛⲟϭ ⲙⲡ︤ⲛ︦ⲁ︥ ⲁϥⲛⲁⲩ ⟨ⲉ⟩ⲛϩⲁⲉⲟⲩ ⲁⲩⲱ ⲁϥⲡⲁⲣⲁⲕⲁⲗⲓ ⲛⲛⲉⲧⲣϩⲏⲃⲉ ⲛⲥⲓⲱⲛ 25 ⲁϥⲧⲁⲙⲟⲟⲩ ⲉⲛⲉⲧⲛⲁϣⲱⲡⲉ ⲛϣⲁⲉⲛⲉϩ ⲁⲩⲱ ⲛⲉⲧϩⲏⲡ ⲉⲙⲡⲁⲧⲟⲩϣⲱⲡⲉ